پاکستان میں سردی کی نئی لہر، پہاڑوں پر برفباری شروع، محکمہ موسمیات نے مزید کیا پیشگوئی کردی؟

ملک کے مختلف علاقوں میں بارش اور برفباری سے سردی کی شدت بڑھ گئی، کئی پہاڑی مقامات نے سفید چادر اوڑھ لی، جبکہ محکمہ موسمیات نے 14 نومبر تک بارش اور برفباری کا سلسلہ جاری رہنے کا امکان ظاہر کردیا۔

پاکستان کے مختلف علاقوں میں موسم نے اچانک کروٹ لے لی ہے۔ بارش اور پہاڑوں پر برفباری کے باعث سردی میں اضافہ ہوگیا ہے، جبکہ کئی سیاحتی مقامات پر خوبصورت برفانی مناظر دیکھنے کو مل رہے ہیں۔ دوسری جانب بعض پہاڑی راستوں پر برف جمع ہونے سے مسافروں اور سیاحوں کو مشکلات کا سامنا بھی کرنا پڑ رہا ہے۔

آزاد کشمیر کے مختلف علاقوں میں مسلسل دوسرے روز بھی بارش اور برفباری کا سلسلہ جاری ہے۔ مظفرآباد اور اس کے آس پاس کے علاقوں میں بارش ہوئی، جبکہ وادی نیلم، وادی لیپہ، باغ، حویلی اور مکڑا و گنجا پہاڑوں پر برفباری سے موسم مزید سرد ہوگیا۔

بارش اور برفباری کے بعد کشمیر کے پہاڑی علاقوں کا قدرتی حسن مزید نکھر گیا ہے، تاہم سرد ہواؤں اور درجہ حرارت میں کمی کے باعث مقامی شہریوں کو گرم کپڑوں کا استعمال بڑھانا پڑ رہا ہے۔

خیبر پختونخوا کے مختلف علاقوں میں بھی موسم سرد ہوگیا ہے۔ دیر کے میدانی اور بالائی علاقوں میں رات سے تیز بارش جاری ہے، جبکہ چترال اور اس کے گردونواح میں بھی بارش کے ساتھ پہاڑوں پر برفباری ہو رہی ہے۔

مانسہرہ کے بالائی سیاحتی علاقوں میں بھی برفباری کا نیا سلسلہ شروع ہوگیا ہے۔ ناران، جھیل سیف الملوک، جھیل لولوسر، بٹہ کنڈی، بیسر اور بابوسر ٹاپ پر برف پڑنے سے پہاڑ سفید چادر میں ڈھک گئے ہیں۔

اطلاعات کے مطابق جھیل لولوسر اور بیسر کے علاقوں میں تقریباً چھ انچ تک برف پڑ چکی ہے۔ مسلسل برفباری کے باعث بعض مقامات پر سڑکوں پر سفر کرنا مشکل ہوگیا ہے۔

سیاحوں کی حفاظت کے پیش نظر انتظامیہ نے بابوسر ٹاپ جانے والی سڑک کو بٹہ کنڈی سے عارضی طور پر بند کردیا ہے۔

کاغان ڈویلپمنٹ اتھارٹی نے برف ہٹانے اور راستوں کی صورتحال بہتر بنانے کے لیے مختلف مقامات پر مشینری اور عملہ تعینات کردیا ہے۔ انتظامیہ نے سیاحوں کو ہدایت کی ہے کہ وہ پہاڑی علاقوں کا سفر کرنے سے پہلے سڑکوں کی صورتحال معلوم کریں اور متعلقہ اداروں کی ہدایات پر عمل کریں۔

بلوچستان کے علاقے چمن اور اس کے گردونواح میں بھی وقفے وقفے سے ہلکی بارش ہو رہی ہے، جس کے باعث موسم میں خنکی بڑھ گئی ہے۔

محکمہ موسمیات کے مطابق آئندہ 24 گھنٹوں کے دوران بھی ملک کے بعض علاقوں میں مزید بارش ہونے کا امکان ہے، جبکہ بارش اور برفباری کا موجودہ سلسلہ 14 نومبر تک جاری رہ سکتا ہے۔

دوسری جانب کراچی میں موسم کی صورتحال ملک کے شمالی علاقوں سے مختلف رہنے کی توقع ہے۔

محکمہ موسمیات نے کراچی میں 13 نومبر کو موسم جزوی طور پر ابر آلود رہنے کی پیشگوئی کی ہے، جبکہ شہر کے بعض علاقوں میں ہلکی بارش یا بوندا باندی بھی ہوسکتی ہے۔

کراچی میں زیادہ سے زیادہ درجہ حرارت 32 سے 34 ڈگری سینٹی گریڈ جبکہ کم سے کم درجہ حرارت 22 سے 24 ڈگری سینٹی گریڈ رہنے کا امکان ہے۔

صبح کے وقت ہوا میں نمی کا تناسب 75 سے 85 فیصد اور شام کے وقت 45 سے 55 فیصد رہنے کی توقع ہے۔ شہر میں ہوائیں مغرب اور جنوب مغرب کی سمت سے چل سکتی ہیں۔

محکمہ موسمیات کی پیشگوئی کے مطابق کراچی میں باقاعدہ سرد موسم کا آغاز 15 دسمبر کے بعد متوقع ہے۔

ملک کے شمالی علاقوں میں برفباری کے باعث جہاں سیاحتی مقامات کی خوبصورتی میں اضافہ ہوا ہے، وہیں انتظامیہ نے مسافروں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی ہے۔

خاص طور پر ناران، کاغان اور بابوسر ٹاپ جانے والے سیاحوں کو مشورہ دیا گیا ہے کہ وہ روانگی سے پہلے موسم اور سڑکوں کی تازہ صورتحال ضرور معلوم کریں تاکہ کسی پریشانی سے بچا جاسکے۔