پاکستان کو موسمیاتی تبدیلی سے بڑا خطرہ، وزیراعظم شہباز شریف نے عالمی رہنماؤں کے سامنے کیا اہم مطالبہ رکھ دیا؟

وزیراعظم شہباز شریف نے ترکیہ میں عالمی موسمیاتی کانفرنس سے خطاب کرتے ہوئے خبردار کیا ہے کہ موسمیاتی تبدیلی پوری دنیا کے لیے ایک سنگین خطرہ بن چکی ہے، پاکستان کو کم آلودگی پھیلانے کے باوجود شدید قدرتی آفات کا سامنا کرنا پڑ رہا ہے۔

وزیراعظم شہباز شریف نے کہا ہے کہ موسمیاتی تبدیلی کسی ایک ملک یا علاقے کا مسئلہ نہیں بلکہ پوری دنیا کے لیے ایک بڑا چیلنج ہے۔ اس کے اثرات سرحدوں تک محدود نہیں رہتے اور قدرتی آفات کے باعث لاکھوں افراد کی زندگیاں متاثر ہونے کے ساتھ معیشت کو بھی بھاری نقصان پہنچتا ہے۔

ترکیہ کے شہر انطالیہ میں موسمیاتی تبدیلی سے متعلق عالمی کانفرنس کوپ 31 کے اعلیٰ سطح اجلاس سے خطاب کرتے ہوئے وزیراعظم نے پاکستان کو درپیش موسمیاتی خطرات اور ان سے ہونے والے نقصانات پر روشنی ڈالی۔

وزیراعظم نے کہا کہ پاکستان ان ممالک میں شامل ہے جو موسمیاتی تبدیلی کے اثرات سے سب سے زیادہ متاثر ہو رہے ہیں، حالانکہ عالمی سطح پر کاربن کے اخراج میں پاکستان کا حصہ ایک فیصد سے بھی کم ہے۔

انہوں نے 2022 کے تباہ کن سیلابوں کا ذکر کرتے ہوئے کہا کہ اس قدرتی آفت کے دوران پاکستان کا تقریباً ایک تہائی حصہ پانی میں ڈوب گیا تھا۔

شہباز شریف کے مطابق ان سیلابوں سے ملک بھر میں تقریباً 3 کروڑ 30 لاکھ افراد متاثر ہوئے، جبکہ گھروں، سڑکوں، فصلوں اور دیگر بنیادی سہولتوں کو بھی بڑے پیمانے پر نقصان پہنچا۔

وزیراعظم کا کہنا تھا کہ سیلاب کی تباہ کاریوں نے نہ صرف لاکھوں خاندانوں کی زندگیوں کو متاثر کیا بلکہ پاکستان کی معیشت پر بھی گہرے اثرات مرتب کیے۔

انہوں نے مشکل وقت میں پاکستان کی مدد کرنے پر ترکیہ کی حکومت اور عوام کا خصوصی شکریہ ادا کیا۔

شہباز شریف نے کہا کہ 2022 کے تباہ کن سیلابوں کے دوران ترک حکومت اور عوام پاکستان کے ساتھ کھڑے رہے اور متاثرہ افراد کی مدد میں اہم کردار ادا کیا۔

وزیراعظم نے عالمی برادری پر زور دیا کہ ترقی پذیر ممالک کو موسمیاتی تبدیلی کے اثرات سے بچانے کے لیے کیے گئے وعدوں کو عملی شکل دی جائے۔

انہوں نے کہا کہ پاکستان ماحول دوست اقدامات کو فروغ دے رہا ہے، لیکن موسمیاتی خطرات سے نمٹنے کے لیے ترقی پذیر ممالک کو مناسب مالی وسائل اور عالمی تعاون کی ضرورت ہے۔

وزیراعظم نے ترک صدر اور عوام کی جانب سے بہترین مہمان نوازی پر شکریہ ادا کیا اور کوپ 31 کانفرنس کے انتظامات کو سراہا۔

پاکستان میں شمسی توانائی کا انقلاب، وزیراعظم کا اہم انکشاف

اس سے قبل صاف توانائی کی جانب منتقلی سے متعلق ایک اعلیٰ سطح اجلاس سے خطاب کرتے ہوئے وزیراعظم شہباز شریف نے پاکستان میں شمسی توانائی کے بڑھتے ہوئے استعمال کو اہم کامیابی قرار دیا۔

انہوں نے کہا کہ پاکستان میں سولر توانائی کے منصوبوں کے ذریعے نسبتاً سستی بجلی حاصل کرنے میں مدد ملی ہے اور ملک میں خاموشی سے شمسی توانائی کا ایک بڑا انقلاب آ رہا ہے۔

وزیراعظم کے مطابق شمسی توانائی کا بڑھتا ہوا استعمال پاکستان کو صاف، سستی اور قابلِ اعتماد توانائی کے مستقبل کی طرف لے جانے میں اہم کردار ادا کرسکتا ہے۔

انہوں نے کہا کہ پاکستان میں الیکٹرک گاڑیوں اور موٹرسائیکلوں کے استعمال میں بھی اضافہ ہو رہا ہے۔

شہباز شریف نے بتایا کہ ملک میں فروخت ہونے والی ہر دس موٹرسائیکلوں میں سے ایک الیکٹرک موٹرسائیکل ہے۔

وزیراعظم نے مزید کہا کہ حکومت نے 2030 تک نئی فروخت ہونے والی گاڑیوں میں الیکٹرک گاڑیوں کا حصہ 30 فیصد تک پہنچانے کا ہدف مقرر کیا ہے۔

تاہم انہوں نے واضح کیا کہ ان اہداف کو حاصل کرنے کے لیے مناسب سرمایہ کاری اور مالی وسائل کی دستیابی انتہائی ضروری ہے۔

وزیراعظم کے مطابق اگر ترقی پذیر ممالک کو مطلوبہ مالی تعاون فراہم نہ کیا گیا تو صاف توانائی کی طرف منتقلی اور موسمیاتی تبدیلی سے نمٹنے کے اہداف حاصل کرنا مشکل ہوسکتا ہے۔

انہوں نے عالمی برادری سے مطالبہ کیا کہ موسمیاتی تبدیلی کے نقصانات کا سامنا کرنے والے ممالک کو مالی اور تکنیکی مدد فراہم کرنے کے وعدے پورے کیے جائیں۔

وزیراعظم شہباز شریف کا کہنا تھا کہ پاکستان موسمیاتی تبدیلی کے خلاف عالمی کوششوں میں اپنا کردار ادا کرنے کے لیے پُرعزم ہے، لیکن اس مسئلے کا مؤثر حل تمام ممالک کی مشترکہ کوششوں سے ہی ممکن ہے۔